Претходна статија
Ќе се обнови велосипедската патека на булевар „Св. Кирил и Методиј“ во Скопје
Следна статија
Градот Скопје ќе го претвори кејот кај ГТЦ во улица

Привршува реконструкцијата на штипскиот стадион, следуваат оние во Кочани и Турново

Објавено на 03.03.2017 во категорија Вести.

 

Привршува реконструкцијата на градскиот стадион во Штип. По повеќе од 70 години од неговата изградба, пред неколку дена се одигра првиот вечерен натпревар под рефлектори, со што и официјално беше одбележана реализацијата на првата фаза од реконструктивниот зафат. Во рамките на „хет-трик“ програмата за санација на пет фудбалски стадиони во земјава, Фудбалската федерација на Македонија и општина Штип поставија нова дренажа на фудбалскиот терен и осум рефлектори за одржување на ноќни натпревари. Локалната самоуправа пред месец дена распиша тендер за покривање на северната трибина од стадионот, чија проценета вредност изнесува 4,5 милиони денари.

 

 

Општина Штип е должна во наредниот период да го уреди целокупниот трибински простор, по што ќе се обноват и соблекувалните во склоп на градскиот стадион. Целокупната реконструкција ќе чини околу половина милион евра, кои се заеднички обезбедени од УЕФА и од локалната самоуправа. Паралелно со поддршката на штипскиот фудбал, од ФФМ денеска излегоа со информација дека во иднина ќе се санираат и фудбалските стадиони во Кочани и Турново лоцирани на истокот од земјава.

 

Веќе е направен предпроект за обнова, а ФФМ аплицирала за финансиски средства од УЕФА и ФИФА. На стадионот во Турново во тек е реновирање и прилагодување на соблекувалните, реконструкција на кровната конструкција и изградба на нова допинг просторија. За градскиот стадион во Кочани е предвидено да се реконструира фудбалскиот терен и да се изврши подготовка на траса за поставување на нова хидрантна мрежа.