Вести

Турските бизнисмени до крајот на 2011 година во Македонија ќе вложат најмалку уште 500 милиони долари беше кажано денес на првиот македонско-турски бизнис форум што се одржува во Охрид.

За кратко време турските инвестиции треба да достигнат вредност од 1 милијарда долари им порача на претставниците на македонскиот бизнис сектор и владата турскиот министер за надворешна трговија и инвестиции Зафер Чаглајн. Во моментов стотина турски фирми веќе инвестирале во Македонија во висина од 180 милиони долари што според Чаглајн не е доволно. За турците, Македонија и покрај светската криза е стабилно место за инвестирање, а земјата има и добра бизнис клима.

„Македонија е перспективна за инвестициски активности бидејќи нашите бизнисмени преферираат земји кои се стабилни и со економски потенцијал. Нашите деловни луѓе покажуваат интерес за Република Македонија. Тоа нема да е само во интерес на економскиот развој на Македонија туку ќе придонесе и за развојот на Балканот и неговата стабилност. Договорот за слободна трогвија кој беше потпишан во 2000 година дава можности за зголемување на трговската размена, но за жал не сме во можност доволно да ги искористиме таквите можности за зголемување на тие можности. Со нашите македонски пријатели ќе се обидеме да ја зголемиме таа соработка“ вели Чаглајн.

Неџми Лак е бизнисмен од Турција кој наскоро треба да ја реализира својата прва инвестиција во Македонија и тоа во фабрика за производство на амбалажа и самолепливи траки. Според него финансиската криза не треба да биде причина да не се инвестира во земјава.

„Ако чекате да помине економската криза тогаш треба да почекате и не треба да правите никакви вложувања.Но јунаците се познаваат и по тоа што знаат да вложат и во ваква ситуација. Нашата цел е да почнеме со бизнис кој треба да биде тежок неколку милиони евра и имаме во план целата стока одовде да ја продаваме во целиот балкански регион. Една од причините поради кои моите колеги сакаат да вложуваат овде е сличниот карактер со вашиот“ рече Лак.

Македонскиот премиер Никола Груевски на турските стопанственици им порача да не се плашат и слободно да вложуваат во Македонија. Според него макроекономското опкружување во 2009 во Македонија ќе остане стабилно, инфлацијата ќе биде ниска, а курсот на домашната валута ќе биде стабилен. Македонската економија според Груевски ќе расте за еден процент и ќе биде една од ретките економии која ќе бележи раст.

„Како една од клучните мерки која за вас ќе биде интересна е ослободувањето од оданочување на добивка кај компаниите кои ќе се одлучат да ја задржат и да не ја распределат во дивиденди со што значително ќе се подобри ликвидноста на компаниите. Сакам да изразам силно верување дека договрените проекти како што е инвестицијата на ТАВ во моденизацијата на македонските аеродроми, но и други проекти ќе бидат успешно реализирани и со тоа ќе се овозможи брзо излегување од неповолните економски текови“ изјави Груевски.

Груевски од своите турски колеги добил уверување дека ТАВ до крајот на август ќе започне со модернизацијата на аеродромите во Скопје и Охрид, но дека и другите турски компании од септември ќе почнат да ги реализират најавените инвестиции кај нас. Било договорено да отпочне постапка на формирање на мешовити македонско-турски фирми за заеднички настап на странските пазари.

Мики Трајковски
Со порака да се искористат потенцијалите за соработка и да се зголеми нивото на трговска размена на форумот настапија и претседателите на Собранието на турски извозници и на Сојузот на стопански комори и берзи на Турција, Мехмед Бујукекши и Рифат Хисарџиклиоглу.