Резиденцијални објекти

Резиденцијален комплекс на 19 хектари во Бардовци

КОНТРОВЕРЗНА НАЈАВА ЗА ЕКОНАСЕЛБА ВО БАРДОВЦИ

Владата сака да гради на туѓ имот

Околу 20 сопственици на денационализираниот имот се чудат како нивното земјиште може да им се нуди на инвеститори

Владата на Македонија и' нарачала и и' платила урбанистички план на Општина Карпош за изградба на еконаселба во Бардовци,но речиси 90 отсто од локацијата за на која е планирана населбата се приватна сопственост, иако се тврди дека е државно. Околу 20 сопственици тоа земјиште лани го добиле со денационализација. Станува збор за 19 хектари, над базната трафостаница кај селото Бардовци, односно парцелата што е заведена под бројот 112/1. Сопствениците од ова земјиште ни покажаа имотни листови и се вчудовидени од фактот како властите се фалат дека ќе градат населба на туѓ имот, односно дека ќе им го продаваат нивното земјиште на инвеститори.

- Ова земјиште пет години беше предмет на денационализација. Конечно лани, по неколкугодишна голгота, ги добивме имотните листови. Наше е дали ќе го продаваме земјиштето или сами ќе градиме на локацијата, но не знам како можеле да донесат вакви одлуки. Претходно, корисник на оваа парцела беше Министерството за одбрана, а сопственик државата. Од целиот имот, кој е со површина до 240.000 квадратни метри, државата е сопственик само на 15.000 квадратни метри - изјави сопственик на еден дел од оваа локација.

Предлог-урбанистичкиот план за еконаселбата во Бардовци се усвои завчера, на седница на Советот на Карпош, а беше најавен како владин проект за ексклузивна населба од типот на Сончев град и Зајчев рид. Населбата е замислена како реон каде што ќе има објекти, изградени според високоеколошки стандарди.

Проектантите на завчерашната седница пред советниците тврдеа дека земјиштето е државно. Објаснија дека локацијата е поделена на 17 мегапарцели, кои по усвојувањето на планот ќе се уредуваат со урбанистички проекти. На една парцела може да има еден, но и повеќе објекти, во зависност од желбите на инвеститорот.

Предвидено е да се градат ниски објекти со изолација, сончеви колектори, објекти што би користеле гас како гориво. Се оди кон тоа да се изградат градби што максимално би штеделе енергија. Покрај објектите за домување, со планот е предвидено да се изградат и резиденцијални, како и деловно-комерцијални објекти.