Промовирана новата населба Градина

Во последната објава за продажба на градежно неизградено земјиште сопственост на Република Македонија по пат на електронско јавно наддавање, по прв пат се понуди домување во семејни куќи, предвидени во Деталниот урбанистички план за урбана единица 11.05 и 11.04, во населба наречена Градина, на местото на поранешните оранжерии.

Новата населба е замислена како модерна европска населба, за 13. 000 жители, еден мал современ град во поглед на намените кои се предвидени. Предвидената населба овозможува идеални услови за задоволување како на основната човекова потреба за домување. Населбата Градина е на само 1,5 км раздалеченост од строгиот центар на Прилеп. За потребите на овој комплекс предвидена е комплетна инфраструктура, која ќе се изведи според Деталниот урбанистички план. Инфраструктурата е предвидена по европски стандарди: широки улици, тротоари, велосипедски и пешачки патеки, енергетски ефикасно осветлување, централно греење, многу зеленило, градинка, училиште, спортски центри, трговски центри и се она што претставува модерна и урбана населба.

Инвеститорите во оваа населба ќе бидат задолжени да градат градби кои ќе ги задоволуваат критериумите на енергетска ефикасност, односно користење сончева енергија, термика во изградбата, технолошка вода и сл.

Населбата Градина е со површина од 42 хектари, со предвидени градежни парцели за станбени куќи и станбени куќи со посебен режим, парцели за станбени згради, за деловни објекти, големи трговски и угостителски единици, за образование, објекти за спорт и рекреација, како и парцели за комунална супраструктура односно за изградба на трафостаници.

За станбените куќи и станбените куќи со посебен режим предвидени се 368 градежни парцели. Станбените куќи со посебен режим се со просечна површина на парцела од 600м², додека станбените куќи со просечна површина на парцела од 300м² и со максимална дозволена височина за градба од приземје, 2 ката и поткровје.

За станбени згради се предвидени 24 парцели со површина на парцела која се движи од 800 до 4300м² и со максимална дозволена височина за градба од приземје, 3 ката и поткровје, до височина од приземје, 9 ката и поткровје.

Предвидени се 7 парцели за мали комерцијални и деловни намени со просечна површина на парцела од 1000м² и максимална дозволена височина за градба од приземје и два или три ката, во зависност од големината на парцелата.

За намената големи трговски единици-Б2, во која спаѓаат трговски центри, супермаркети, затворени пазари, превидени се 7 градежни парцели со просечна површина на парцела од 5000м2 и максимална дозволена височина за градба од приземје, 2 ката и поткровје.

За големи угостителски единици-Б3, каде што спаѓаат ресторани, таверни, дискотеки, предвидени се 2 градежни парцели со просечна површина на парцела од 1100м² со максимална дозволена височина за градба од приземје и 3 ката.

Парцелата предвидена за изградба на училиште во оваа населба е со површина од 11 336м² и со височина од приземје и 2 ката.
Предвидени се 2 градежни парцели за изградба на спортско-рекреативни сали со површина од 700 и 23 000м².

Во границите на оваа населба, а во консултации со ЕВН, предвидени се 13 парцели за изградба на трафостаници кои се потребни за нормално функционирање на оваа населба.

Во последната објава за продажба по пат на електронско јавно наддавање, понудени се 14 градежни парцели, со просечна површина на парцела од 300м², со максимална дозволена височина за градба од приземје, 2 ката и поткровје. Предвидената површина за градба се движи од 90 до 160м².

Откако ќе биде продаден овај модул, ќе се пристапи кон продажба на останатите модули, онака како ќе пристигнуваат елаборатите.
Почетна цена за електронското наддавање на овие парцели е 61ден. за м², со нареден чекор од 10ден.