Аеродромите во Македонија оваа година забележале зголемување на обемот на летови и превоз на патници за 13.5 отсто, соопштуваат од Министерството за транспорт и врски.

На аеродромот “Александар Велики“ во јануари 2010 биле остварени 927 летови со вкупно 44.822 патници, што претставува 5.7 отсто пораст во однос на јануари, каде што бројот на превезени патници изнесувал 40.217.

На аеродромот “Св. Апостол Павле“ во јануари, минатата година бројот на превезувани патници изнесувал 2.533, или околу 68.2 отсто повеќе патници за разлика од ланската година.

Најголем пораст од 155.6 отсто во воздушниот сообраќај на двата аеродроми е забележан на чартер- линиите.

Со стапувањето во сила на договорот на концесија и модернизација на македонскиот аеродромски систем, македонските аеродроми очекуваат дополнително зголемување на летовите и патниците.

Техничките подготовки за аеродромот се во завршна фаза, а сите 800 вработени ги потпишале новите договори за работа

ТАВ допрва ќе бара пари

Инвестицијата од 200 милиони евра за модернизација на македонските аеродроми целосно ќе се реализира, иако се' уште не е затворена финансиската конструкција, гарантира Мурат Орнекол, оперативен директор на турскиот холдинг

Турскиот холдинг ТАВ в понеделник официјално ќе ги преземе на дваесетгодишно управување аеродромите во Скопје и во Охрид, а со изградбата на карго-аеродромот во Штип ќе почне по десет години, откако ќе заврши метеоролошката студија за локацијата. Ова, вчера на средба со новинарите во Скопје го изјави главниот оперативен директор на ТАВ холдинг, Мурат Орнекол. Тој гарантираше дека целосно ќе се реализира инвестицијата од 200 милиони евра за модернизација на македонските аеродроми, иако се' уште не е затворена финансиската конструкција.

- Имаме една група банкари што веќе преговараат со 20-25 претставници од институции, предводени од Стандард банка, од турскиот конзорциум Халк банка, кои ќе ја обезбедат финансиската конструкција. Тоа ќе потрае неколку недели, но не значи дека нема да почнеме со работата. Напротив, таа ќе почне со пари обезбедени од сопствени извори и во соработка со неколку други банки - рече Орнекол.

Според него, изградбата на карго-аеродромот во Штип се одлага за да се запазат стандардите на Меѓународната асоцијација за цивилно воздухопловство, кои предвидуваат низ 10-годишна метеоролошка студија да се утврди дали локацијата ги исполнува условите за изградба на аеродром. Орнекол гледа економска исплатливост на карго-аеродромот во натамошниот економски развој на државата и очекувањата за инвестиции по членството на Македонија во Европската Унија.

Главната церемонија со поставување камен-темелникот се најавува меѓу 15 и 20 март, во присуство на премиерите на Македонија и на Турција и на раководството на ТАВ холдинг.

Согласно концесискиот договор со Владата, повтори Орнекол, ТАВ гарантира за работните места на вработените во скопскиот и во охридскиот аеродром, со нивните постојни права. Покрај постојните вработени, кои веќе се преземени од новоформираната компанија ТАВ Македонија, ќе бидат ангажирани и кадри од ТАВ, а турскиот инвеститор ветува и ангажман на домашни градежни фирми во реконструкцијата и во модернизацијата на аеродромите.

- Преферираме да работиме со локален персонал и со локални компании и сакаме да придонесеме за развојот на економијата во Македонија - рече Орнекол.

Тој истакна дека ТАВ ќе се залага да привлече што повеќе авиокомпании на македонските аеродроми за да оствари исплатлива инвестиција.

- Целта е да се здобиеме со предност пред конкуренцијата во регионот и да ги привлечеме авиокомпаниите со кои работиме низ целиот свет. Веќе преговараме со нив да слетуваат во Македонија, но не заборавајте дека самите компании одлучуваат за цените на летовите. Ако немате домашен авиопревозник, тогаш ја губите шансата да добивате летови од другите земји. Се обидуваме да привлечеме компании да дојдат во Македонија со цел да се регистрираат како национален авиопревозник. Во спротивно, авиосообраќајот ќе биде блокиран - рече Орнекол.

Согласно Договорот за концесија, на аеродромот „Александар Велики“ е предвидена изградба на нова терминална зграда од 40.000 квадратни метри, да се продолжи полетно-слетната патека за 500 метри, да се инсталира систем за навигација и друга опрема за аеродромот да функционира во согласност со меѓународните стандарди. На аеродромот „Св. Апостол Павле“ во Охрид треба да се изврши реновирање на објектите во карго-центарот, да се изгради ВИП-објект, да се реконструира административна зграда и друго.

Турски ТАВ оперира во аеродроми во седум земји и опслужува 42 милиона патници годишно. Во проекциите за Македонија предвидува годишен проток од 5 милиони патници на скопскиот и 200 илјади на охридскиот. ТАВ и Владата склучија Договор за концесија во септември 2008 година, но инвестицијата беше одложена поради неможноста турската компанија да обезбеди пари поради светската економска криза.

ТАВ нов газда на аеродромите