Поставен камен-темелник на нов спортски центар во општина Илинден

Во Кадино се гради профи-фудбалско игралиште

Ова игралиште е 31. од Програмата "Изградба на 50 спортски игралишта низ државата", којшто го реализира Владата преку Агенцијата за млади и спорт

Младите спортисти, рекреативци и љубителите на фудбалот, жители на Кадино, наскоро ќе добијат ново игралиште со професионални димензии од 120 на 80 метри. Фудбалското игралиште ќе биде опремено со модерна опрема, ќе има монтажни трибини и соблекувална. Ќе биде осветлено со рефлектори за да се користи и во вечерните часови. Ова игралиште е 31. од Програмата "Изградба на 50 спортски игралишта низ државата", кој што го реализира Владата преку Агенцијата за млади и спорт-АМС.

Почетокот на градежните работи на новото фудбалско игралиште беше означен вчера. Темелите ги осветија свештеници од селската црква Свети Илија, а симболичното фрлање на првата лопата го извршија премиерот Никола Груевски, директорот на АМС Драган Ѓурчевски и градоначалникот на Општина Илинден Жика Стојановски.

Во своето обраќање пред месното население, премиерот Груевски истакна дека овој проект е дел од стратегијата на Владата за инвестирање во спортот за развој на здрава младина.
- Некои не критикуваат зошто градиме и зошто најавуваме уште поголемо градење. Некои и не веруваа дека тоа што го ветуваме ќе го оствариме и дека ќе привлечеме инвеститори да го градат. Да оставиме нека не веруваат. Ние чекор по чекор, камче по камче, секој ден, недела, месец, секоја година во наредните години ќе градиме, ќе почнуваме градби, ќе ги надгледуваме нивните текови, ќе ги завршуваме, ќе ги пуштаме во употреба. Едноставно некои луѓе се родени да критикуваат, да оспоруваат да омаловажуваат, други се родени да создаваат. Тоа е разлика која јас верувам секој ќе ја препознае, рече Груевски. Тој се заблагодари на градоначалникот на Општина Илинден Жика Стојановски за соработката во реализацијата на овој, но и на други владини проекти во општината.

Директорот на Агенцијата за млади и спорт Драган Ѓурчевски истакна дека инвестирањето во спортот е во рамки на стратегијата за создавање на здрава, социјализирана и физички активна младина.

Во општина Илинден во завршна фаза е уште едно помошно фудбалско игралиште, а од минатата година во функција е и новата спортска сала "Гоце Делчев".