Пешачки зони и помали плоштади (општо)

ЗАВРШИ РЕКОНСТРУКЦИЈАТА НА ПОПУЛАРНОТО ШЕТАЛИШТЕ

Улицата Македонија комплетно обновена

За десетина дена свечено ќе биде пуштен во употреба и третиот обновен дел од улицата Македонија, во делот кај хотелот „Бристол“, најавуваат од Општина Центар. Со тоа ќе биде заокружена комплетната реконструкција на популарното шеталиште во центарот на градот.
- Пуштањето на третиот дел од оваа улица ќе се случи штом ќе пристигнат новите клупи со карактеристичен дизајн, кој не може да се сретне во градов - вели Лидија Неделковска, шеф на кабинетот на градоначалничката на Центар, Виолета Аларова. Таа вели дека во минатата недела пробно биле поставени прототипови на новиот вид полукружни клупи, со цел да се испита реакцијата на граѓаните. Клупите имаат сосема нов дизајн, кој се разликува од оној на првиот и на вториот дел од улицата. И тие ќе бидат полукружни, но помали, зашто во третиот дел од улицата се вози, па нема доволно место за пошироки.

Неделковска вели дека граѓаните се задоволни од изгледот на новите клупи, па Општината деновиве ќе ги набави и останатите од скопската фирма „Еко лес“.

- Ваквиот дизајн е погоден и според големината одговара на третиот дел од улицата, кој е потесен. И новите кошници за отпадоци ќе имаат карактеристичен дизајн - вели Неделковска.

Во изминатите месеци Општина Центар го обнови и последниот, трет дел од улицата Македонија, од раскрсницата со „Даме Груев“ до Музејот на град Скопје. Обновени се тротоарите од двете страни, кои се поплочени со гранитни плочи, идентични на пешачката зона од улицата. Поставени се и нови рабници, нова електрична инсталација и осум канделабри, донација од Инвест банка. Ќе бидат поставени вкупно девет клупи, шест жардиниери и 11 кошници за отпадоци, а ќе се засадат и осум дрвја од видот лириодендрони, какви што има на првите две делници.

Од Општината велат дека на новите тротоари се поставени столпчиња, за да не можат да се паркираат возила, со што ќе се заштити гранитот од оштетување, а истовремено ќе се ослободи простор за пешаците.

Општината Центар почна да ја обновува улицата Македонија пред четири години. Првата делница, од плоштадот до улицата Димитрие Чуповски, беше пуштена во употреба во 2004 година. Парите за обновата се од општинската каса на Центар.

(А.П.)