Сеизмологија

за помал интензитет на резонанца мислам дека тоа се оние старите маркети на славија, картонските, додека за поголем интензитет посекако на удар се новите кибрит (безгредови) конструкции по мичурин, дебар маало, карпош...

Градат катови на згради без столбови

Експерти по сеизмика предупредуваат дека надградбите на старите згради во Карпош 1 претставуваат опасност за станарите при силен потрес, затоа што објектите имаат само ѕидови и не може да поднесат дополнително оптоварување

Големите потреси може да бидат кобни за старите предземјотресни згради во Карпош 1 каде што наголемо се надградуваат катови, затоа што не може да издржат таков товар, предупредуваат експерти по сеизмика. Проблемот е што овие згради се градени без столбови. Во оваа населба веќе две години владее инвазија за надградување и доградување на катови и на тераси, а тоа, според нашите соговорници, е опасно за стабилноста на објектите.

Надградбите може да предизвикаат големи штети на самите згради, а може да дојде и до загуба на човечки животи, вели Круме Атанасовски, магистер по статика и градежен инженер.

- Кој ќе одговара ако утре се случи такво нешто? Не е исклучено при силни потреси зградите да паднат бидејќи се ѕидана конструкција од тули, без армирано-бетонски столбови. Воедно, зградите претрпеа големи оштетувања од катастрофалниот земјотрес - вели Атанасов.

Станува збор за 6 од 12 објекти кои го „преживеаја“ земјотресот во 1963 година. Градежните работи на зградите на улиците Даскал Камче 3, Рузвелтова 55 и 59, како и на Гиго Михајловски 2 се веќе готови. На улицата Никола Тесла 8 градбата е стопирана, а на улицата Руѓер Бошковиќ работите не се почнати. Граѓаните сметаат дека Општина Карпош и покрај целата сериозност на проблемот останала глува на апелите да не издава одобренија за надградба на старите згради.

Атанасовски предупредува дека во повеќето згради за доградбите на терасите морале да се исечат армирано-бетонските платна (кожуси) што биле поставени со санацијата по земјотресот. Со овие потези е намалена отпорноста на објектите на сеизмичките влијанија.

Она што дополнително внесува немир е дека по земјотресот овие згради биле „обележани со црвено“, односно биле одредени за уривање. Но, како што вели Атанасов, кој тогаш бил инспектор во Општина Идадија, со разни проекти за сеизмика и статика зградите сепак биле спасени.

- Во овој реон, поточно во Карпош 2, се случил најголемиот потрес, при кој имало голем број жртви, особено во зградата број 13, која целосно била разурната - предупредува Атанасов.

Интересно е што за пет од овие згради како инвеститор за надградбите се води Тони Велјанов. Дел од одобренијата за градба биле издадени во времето на поранешниот градоначалник Андреј Петров, а дел во времето на в.д. градоначалникот Сашо Димиќ, кој се води и како станар во зградата на Даскал Камче.

Локалните власти тврдат дека сеизмичките проекти, доставени при процедурата за градежни дозволи, ја гарантираат безбедноста на зградите.

- Освен за зградата на улица Гиго Михајловски број 2, за сите други надградби инвеститор е Тони Велјановски. Во основниот проект што се доставува до Општина Карпош инвеститорот приложува документи за фаза архитектура, фаза статика и ревизија на основниот проект. Врз основа на добиената техничка документација, Општина Карпош издава одобрение за градба. Статичарот гарантира дека доградбата и надградбата се изградени во согласност со законските прописи. Значи, за стабилноста на зградите, доградбите и надградбите гарантира лиценцирана фирма - изјавија од Карпош.

Јорданка Ивановска