Ски центар Кожуф

Скијачкиот центар „Кожуф“ ќе стартува на 8 декември

Монтирањето на жичницата е при крај, а се гради и пристапниот пат од гевгелиска страна

Само годинава во ски-центарот „Кожуф“ ќе се инвестираат девет милиони евра во три крупни инфраструктурни објекти: далновод, шестоседечка жичница и пристапен пат

АНГЕЛ ДАНОВ

КОЖУФ ПЛАНИНА – Годинава Македонија ќе го добие новиот скијачки центар на Кожуф Планина, кој се наоѓа на над 1.900 метри надморска височина. Само годинава во него се инвестирани девет милиони евра во три крупни инфраструктурни објекти: далновод, шестоседечка жичница и пристапен пат од гевгелиската страна. Инвеститорите се задоволни од динамиката со која се реализираат предвидените проекти и се оптимисти дека годинава од 8 декември ќе започне промотивно скијање на патеките. За почеток скијачкиот центар „Кожуф“ ќе работи како дневен центар.

Од гевгелиска страна со пари од државата ќе се изгради пристапниот пат со вкупна должина од 13 км и широчина од 4,5м. Тендерот завршува на 23 ноември и се очекува со асфалтирање да се почне во декември годинава. Според најавите на менаџерскиот тим на ски-центарот „Кожуф“, во програмата за 2009 година е влезена и изградбата на пат од четериесетина километри, што треба центарот да го поврзе со Кавадарци и Демир Капија. Овие два патни правца ќе се сврзуваат кај селото Крњево, а ќе го направат скијачкиот центар достапен за граѓаните на Македонија, додека патот од гевгелиска страна е повеќе наменет за гостите од Грција.

Извршниот директор на ски-центарот „Кожуф“, Ангел Наков, информира дека привршуваат работите околу изградбата на подземен далновод со две линии, кој треба во целост да ги покрие потребите за струја на центарот. Изградбата целосно е финансирана од нивната компанија, а работите ги изведува ЕСМ и МЕПСО-оператива. Наков најави дека во втората фаза ќе се градел уште еден крак од Демир Капија. До крајот на октомври или почетокот на ноември скијачкиот центар комплетно ќе добие електрична енергија. Во моментов се изведуваат завршните работи на двете трафостаници.

При нашата посета се монтираа 12 столба за шестоседечка жичница, која била единствена од таков тип на Балканот. Нејзината изградба ќе чини 4,2 милиони евра. “Жичницата веќе ја завршуваме. Изградена е почетната и крајната станица, а сега се поставуваат и столбовите. Работите ги извршува швајцарската компанија ’Хелок хели свис‘ која е лидер во светот за овој тип работи. Работи тим од 6 луѓе од Швајцарија, 2 супервизори од Австрија од компанијата ’Допел Маер‘ и 14 луѓе од нашата компанија и ’Метал инвест‘ од Кавадарци”, вели Наков. Тој додава дека вкупно годинава на скијачкиот центар ќе бидат инвестирани девет милиони евра, главно сопствени средства и дел кредити од Стопанска банка.

Селото во скијачкиот центар опфаќа 55 ха, а на дваесетина од нив ќе бидат изградени хотели со вкупен капацитет од 3.000 легла. Наков нагласува дека наредната сезона ќе бидат пуштени во работа два поголеми објекта, чија изградба ќе започне во април 2008 година. „Имаше доста шпекулации околу основачите и партнерите на компанијата на самиот старт во 2000 година. Само 15-16 отсто имаше учество грчки партнер, но поради административни пречки, во 2002 го напушти проектот и од 2003 година компанијата е сто отсто македонска, во целост работите се изведуваат со македонски капитал“, вели Наков.

За наредната година планирана е изградба на уште три жичници, хотел во сопственост на компанијата „Ски Кожуф“ со капацитет од 150 легла и околу 3.000 м2 деловен простор, а наредната сезона ќе се изграделе околу 60 викенд- куќи. Центарот ќе има вкупно околу 1.000 легла.

„Одлично место за скијање. Гледам многу потенцијал овде. Се' е на едно место. Ќе биде добро за скијачи-почетници, но и за искусни скијачи. Ќе дојдам овде на скијање, а ќе донесам и професионални скијачи”, ни рече Енгелхарт Пергаци, менаџер на компанијата што ја монтира жичницата. Пергаци бил неколкугодишен член на швајцарската ски- репрезентација и долги години бил на првото место во спуст и велеслалом.