Паркирање и паркинзи (општо)

Свештениците од „Свети Димитрија“ против рампата на паркингот

Свештенството од црквата „Свети Димитрија“ во вторник ќе излезе на мирен протест пред рампата што ја постави ЈП „Градски паркинг“ на улицата пред Меморијалниот центар на холокаустот. Свештениците, поддржани од верници, ќе ја блокираат улицата од 8 до 10 часот во знак на протест поради затворањето на пристапот до црквата. Тие сметаат дека затворањето на улицата и наплатата на паркингот на оваа локација ги крши човековите права на верниците кои сакаат да ги извршат своите верски обреди во една од најстарите цркви во градот. (С.Н.)

Ќе се намалат цените на месечните билети за паркирање

Јавното претпријатие „Градски паркинг“ размислува да ги намали цените на месечните и на годишните билети за паркирање пред да се донесе одлуката за зголемување на цената за еден час паркирање. Одлуката, откако ќе се изврши детална финансиска анализа, ќе биде одново поднесена до Советот на Скопје на одобрување, откако на вчерашната седница директорот на претпријатието Љупчо Јованов ја повлече од дневниот ред.

„Идејата е со поскапувањето да не се избркаат граѓаните од паркинзите, кои и онака малку се искористени, туку да се стимулираат да користат месечни билети, кои економски многу повеќе ќе им се исплатуваат. Поради тоа, се размислува на некои паркиралишта цената на месечните карти да се намали и до 30 проценти“, вели Јованов. Сепак, потврди тој, „Градски паркинг“ останува на ставот дека наплатата на еден час паркирање ќе поскапи двојно. (С.Н.)

Намалени месечните билети за градските паркинзи

За 100 проценти се зголемени цените за паркирање од еден час

Јавното претпријатие „Градски паркинг“ ги поевтини месечните и годишните билети за паркирање на четири паркинзи во градот. Одлуката беше поддржана и од членовите на Советот на Скопје на вчерашната седница. Од друга страна, со истата одлука, за 100 проценти се зголемува цената на паркирањето за еден час. Така, на паркингот „Македонија 1 и 2“, зад старата железничка станица, еден час паркирање наместо 10 денари, сега чини 20 денари. Месечниот билет, пак, од 1.000 е намален на 800 денари, а годишниот од 10.000 на 8.000 денари. На паркингот „Треска“, во Капиштец и на „Макпетрол“, кај Цветниот пазар, цената на месечниот билет од 2.000 е намалена на 1.000 денари, а годишниот од 20.000 на 10.000 денари. Поевтини цени за паркирање има и на паркингот „Камен мост“, каде што вработените во Министерството за транспорт и врски, Факултетот за музички уметности, Средното музичко училиште, банката и други фирми ќе може да паркираат за 400 денари месечно.

Единственото поскапување на месечниот и на годишниот билет, одобрено на вчерашната седница се однесува на паркингот спроти зградата на „Нова Македонија“, каде што наместо 500 денари за еден месец и 5.000 денари за една година, во иднина ќе се плаќа 1.000, односно 10.000 денари. Досега влезот на овој паркинг чинеше 30 денари, а во иднина нема да се плаќа влез, туку по 20 денари од час.

Идејата за промени во цените на паркирањето, според раководството на претпријатието, е да се стимулираат граѓаните да користат месечни и годишни билети. Од друга страна, пак, поскапувањето на билетот за еден час беше оправдано со комуналната такса што „Градски паркинг“ во иднина ќе ја плаќа поради комуналната дејност што ја врши.

Покрај намалувањето на цените на билетите, дел од градските советници побараа и поголема ажурност на Пајак-службата, особено онаму каде што има градски паркиралишта, а граѓаните масовно паркираат на тротоари или на улица. (С.Н.)

Само една од четирите локации предвидени со ГУП е организирана како паркинг

Сања Наумовска

Генералниот урбанистички план на Скопје утврдува четири локации на кои може да се изградат паркиралишта за тешки товарни возила и за автобуси. Тие се лоцирани најчесто во периферните делови на градот, со оглед на забраната за движење на камиони на градските улици од мостот на Вардар во Влае до булеварот „Србија“. Засега, само една од четирите локации е организирана и се користи како паркиралиште. Тоа е паркингот со кој стопанисува приватната фирма „Мактранс“, на булеварот „Војводина“, спроти универзитетот ФОН. Другите три локации, кај Момин Поток, во населбата Железарница и на Качанички пат на излезот кон Косово, засега немаат сопственик, ниту пак некој доставил проект до градската администрација за организирање паркиралиште за тешки возила.

Во Градот Скопје велат дека јавното претпријатие „Градски паркинг“, кое стопанисува со паркиралишта, е заинтересирано да изгради и паркинг за тешки возила, но засега нема доволно финансиски средства. Поради тоа, се очекува поголема заинтересираност на приватни транспортни фирми кои имаат свои возила што би ги паркирале таму, а истовремено би овозможувале и други тешки возила, на домашни фирми или кои транзитираат, исто така да паркираат на нивните паркиралишта. Во Градот велат дека не е исклучено и заедничко стопанисување на „Градски паркинг“ и некоја приватна фирма.

Вакви паркиралишта, велат во Градот, има насекаде во светот, особено во околината на големите градови, каде што е забрането влегување со товарно возило на градски сообраќајници. Градските власти сметаат дека заинтересираноста на транспортерите би била поголема ако оваа забрана кај нас се почитува докрај. Во меѓувреме, на скопските улици, во приватни дворови, но и на јавни површини и паркинзи и понатаму ќе може да гледаме паркирани огромни тешки камиони.

„Проблемот е во тоа што досега никој не бил санкциониран ако камионот го паркира во нива, на приватна земја, или пак некаде на тротоар или на паркинг, како што може да се види низ населбите. Ако се почитува забраната за влегување во град со вакви возила, тогаш секој превозник ќе биде заинтересиран да има простор каде што ќе ги паркира своите возила“, вели Трајко Базерко од Секторот за сообраќај во Град Скопје.

Јавното претпријатие "Градски паркинг" од понеделник ќе стартува со бележење на еднонасочните улици Мито Хаџивасилев Јасмин и Даме Груев каде ќе се имплементира проектот за зонско паркирање, односно паркирање на една сообраќајна лента. Бележењето ќе трае до 26 октомври, а на овие сообраќајници ќе се поставува хоризонтална и вертикална сигнализација.
-Се додека трае бележење на улиците и паркиралиштата на овие сообраќајници, бараме од граѓаните на делови од површините на кои ќе се врши бележење, да не ги паркираат своите возила, за да не ја попречуваат работата, велат во Градски паркинг. Оттаму потенцираат дека возилата кои нема да бидат дислоцирани од овие улици, ќе бидат преместени со специјално возило на пајак службата во непосредна близина каде што нема да пречат.

http://vecer.com.mk/?ItemID=E9EA6F29A55AE34BAC826556FC4672E2